مسحراتي مصر البهيه

مسحراتي مصر البهيه

google_protectAndRun("ads_core.google_render_ad", google_handleError, google_render_ad);

مسحراتى مصر البهية
اصحى وسبح رب البرية
مشيت أرتل وأنشد وأجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم أقبل
وأن كنت قبلى.. لازم أبحر
ولحد آخر نفس ف صدرى
هاشد قلبى وتر واسحّر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى والدرب سالك
ومشيت يا بلدى أسأل سؤالك
الأهلى صاحى.. طب والزمالك؟!
امتى هايصحى ويفوز كذلك؟!
سؤال شاغلنا
من قبل جيلنا
دوخ عقولنا واحتار دليلنا
وخلق قاصدة.. تلحس دماغنا
وخلق تكسب من خلف ذلك

مسحراتى قاعد قبالك
عشان اسحّر ف نور جمالك
يا مصر ياللى الحضارة كانت
متحضرة لك ومخلوقة لك
والكاس هوسنا وقولنا سمعا
والعلم أصبح بضاعة بايرة
لكل جاهل
ف الجهل أمعن
وعاش يباصى لأبو عقل هالك

الأهلى صاحى..
طب والزمالك؟!
■ ■ ■
ع الكورة لما أتركنا ركنة
كل الأعادى هزت شباكنا
وجابوا فينا أجوان كتيرة
وقسمونا لما اتهلكنا
ياريت رياضة تلهب نشاطنا
ماكانش ضعف الأنيميا شاطنا
لكن دى فرجة.. سلبية عرجة
تحرق قلوبنا يطلع شياطنا
نلاقى روحنا ف وضع حالك
الأهلى صاحى.. طب والزمالك
■ ■ ■
حكومتنا وقعت مع المعارضة
سمعت زيطة
قولت النهاردة
الثورة قامت..
قالولى أهدأ
دى كورة حلوة خبطت ف عارضة
يا رب نجى من المهالك
الأهلى صاحى.. طب والزمالك
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
■ ■ ■
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب